Imanol Landaren bloga

ETA erakunde terroristak egindako azken atentatuen aurrean;

Urriaren 30eko goizean 40-50 kilo lehergai zeraman bonba-autoa leherraraziz Iruña-Pamplonan (Nafarroa), Nafarroako Unibertsitateko Kanpusean hamarnaka zauritu arin eraginez eta kalte material ugari sortuz.

Getxoko Udalak honakoa erabaki du:

1.- Burututako atentatu terroristaren aurrean gaitzespen eta arbuiorik irmoena adieraztea.

2.- Elkartasun eta babes osoa helarazten diegu kaltetutako guztiei

3.- Izua salatzen dugu eta ETA erakundeari, behingoz, gure bizitzetatik desagertzeko exijitzen diogu.

4.- Zuzenbide estatuaren tresnak erabiliz ,batasun demokratikoaren bitartez eta oinarrizko giza eskubideen errespetuaren ikuspegitik, terrorismoaren deslegitimazio politiko eta soziala eta honen erabateko porrota lortzeko lan egin dezagun, aldarrikatu nahi dugu.

5.- Mozio honen onarpenaren berri, Nafarroako Unibertsitatea, Iruña-Pamplonako Udala eta Nafarroako Gobernuari emango zaie.

Labels: bozeramaileen batzordea, ETA

Euzko Gaztedik Interneten soilik garatuko den kanpaina bat jarri du abian; kanpaina horren xedea ondokoa da: Euskal Herriko gazteengana “hurbiltzea” eta gazteok “Euskadi ikuspegi positibotik eraikitze aldera” esku har dezaten sustatzea. Ekimen honen bidez, erakunde horrek euskal gazteriaren “dekalogoa eguneratuko du”.

www.gazteabazara.org

Web orrialdeak lehenago alta hartzeko eta ondorik informazioa e-mailez jasotzeko aukera ematen die erabiltzaileei. Hala ere, erakundeak ez du kanpaina hori “norabide bakarrekoa” izatea nahi, eta beraz, partaideen iritziak eta proposamenak ere jasoko ditu.

Labels: EGI

Labels: hitza hitz

HITZA HITZ
Euskal Herriari bai
Bakeari bai
Elkarrizketa politikoari bai
Erabakitze eskubideari bai

Euskal Herriari Bai

• Gaurko eguna, 2008ko urriaren 25a, hautatua zitzaien Araba, Bizkaia eta Gipuzkoa euskal lurraldeetako herritarrei, eusko Legebiltzarrak legez onartua zuen kontsultan parte hartzeko. Kontsulta legeari, Espainiako Gobernuak eta bere presidente Jose Luis Rodriguez Zapaterok helegitea aurkeztuta, Espainiako Erreinuko auzitegi Konstituzionalak epaia adostu eta debekua dio ezarri.
• Gernikatik hasi -eta Amorebieta, Durango, Urkiola eta Legutiano tarteko- hemen, Gasteizen batu gara euskal herrialde desberdinetatik etorritako hautetsiak, Europari eta munduari begira, adierazi eta aldarrikatzera izan bagarela, badela gugan Herririk, eta badela gugan, libre eta demokratikoki gure etorkizuna erabakitzera deituak eta galdetuak izateko eskubiderik.
• Gaur eta hemen, guztiok bat eginik –eta bat eginik, nor bere proiektu politikoen ordezkaritzatik eta nor bere lurralde esparru juridikotik- argi nahi dugu adierazi, Europako gainontzeko herri guztien artean berezko nortasuna duen Herria dela geurea, berezko historia, gizarte-antolakuntza eta kultura ondare dituela, eta bi estatutan kokatutako zazpi lurraldetan du bere leku geografikoa.
Bakeari Bai
• Giza eskubide guztien aldeko konpromisoa geurea dela nahi dugu adierazi; giza eskubide guztiak eta guztienganakoak. Bakean eta libertatean bizitzeko gure eskubidea nahi dugu aldarrikatu. Helburu nagusi dugu Bakea, banakako eta taldeko gure erantzukizuna; geure eskubide ere bada, euskal gizarte garen aldetik.
• Uko egiten diogu biolentzia edo mehatxu orori eta berauen erabilerari, dela egoera politikoa aldarazteko, dela –soluzio bila ibilita- eman litezkeen elkarrizketa eta negoziazio prozesuengan eragina izateko. Bakea zor dio ETAk herri honi. Eskatzen diogu ETAri adierazi beza, biolentziari behin betiko uko egiteko egiazko borondatea duela; hala exijitzen diogu; halako erabakia izango baita prozesu berria hasteko lehen urratsa, eta hortik aurrera, biolentziaren behin betiko amaiera adostuta, etorriko baitzaio geure herriari bakezko etorkizun oparoa.
• Bake-lorpena, gatazka politikoen konpontze bideetatik bereiztearen irizpidea geure egiten dugu. Hortaz diogu, biolentzia ezin erabili litekeela arazo politikoei konponbidea bilatu edo ukatu aitzakiatan.
• Salatu nahi ditugu auzitegietako gehiegikeriak, legediarenak, pertsona, talde, alderdi politiko, hedabide, buruzagi politiko nahiz erakundeenganakoak; berauen eskubideak, berauen askatasuna eta zor zaien berme demokratikoa urratuta ikusi duten neurrian.

Elkarrizketa politikoari Bai

• Herriaren ordezkari politiko garen aldetik, argi nahi dugu adierazi, mugarik gabeko, bazterketarik gabeko elkarrizketa prozesuen alde, gure konpromisoa, alderdi politiko guztien artean adostasuna lortuta, izaera politikoa duen gatazka soluzio bidean jartzearren.
• Normalizazio politikoak eskatzen ditu, bazterketa baino bat-egite ahaleginak; eskatzen ditu baldintzetan berdintasuna aniztasuna bermatzeko; eskatzen ditu alderdi politikoenganako mehatxuak desagertzea eta gizarteko adierazpen politiko orok izan dezala bere legezko adierazpena. Mintzamena, elkarrenganako errespetua, bide demokratikoen aldeko konpromisoa (soilik haienganakoa) dira normalizazio politikorako jatorrizko premisak.

Erabakitze eskubideari Bai

• Libreki erabakitzea dute herri guztiek berezko eskubide. Euskal Herriak berea du, bere etorkizuna erabakitzeko eskubidea; berea du galdetua izateko eskubidea eta hala adierazitako borondatea, errespetatua izatekoa.
• Gaur, XXI. mendea hasi dugun honetan eta printzipio demokratikoaren argitan, ezin ezarri litezke ezta indarrean mantenu ere, alde bakarreko irizpideetatik eraikitako egitura politikoak, betoa eta debekua oinarri dituztela, espainiar nahiz frantziar subiranotasuna aldarrikatzea -soilik haiena- zilegi jota.
• Printzipio demokratikoak eskatzen baitu, tarteko direnen aldetik elkarrenganako errespetua, aintzat elkar hartzea; eta ondorioz, hortik aurrera, akordioak itxi, beren baitan izate politiko desberdinak egon badaudela aitortuta, elkarbizitzarako ateak irekitzeko.
Inposaketa, biolentzia, eta debekua etorkizunik ez duten erabaki eta neurriak dira, eta tamalez, geure Herriari bere egunerokoan ezartzen zaizkionak. Protagonista nagusi, euskal gizartea da; hala da, eta hala behar du. Demokrazian sakontze egitasmoek; banakakoen konpromisoa nahiz taldekoena…, erabakigarri dira Herri honetako gehiengo soziala babesteko, bakea eta libertate bila, akordio berrien ahaleginetan. Bide-zidorrik ez dago, ezta soluzio magikorik ere. Hitza hitz, pausoz pauso, geure Herriarentzat bakea eta bere erabakitze eskubidea helburu, bidetik atera gabe aurrera egiteko… hauek geure hitzak, geure konpromisoa, horra!

Labels: hitza hitz

Labels: batek nmila, euskara, ipara galdu gabe

Queen Mary 2. Getxoko kaian gozatzeko aukera izango dugu 2009ko uztailan.

Informazio gehiago: Queen Mary 2

Labels: Getxo kaia, queen mary 2

Labels: Getxo kaia, Queen elisabeth 2

Getxoko Udalak udalerriko GGKEen funtzionamendu gastuak eta kudeaketa hobetzeko gastuak partzialki fiantzatzeko dirulaguntzak eskatzeko epea zabaldu du, era horretan herriko elkarte sarea indartzeko asmoz. Udalak gehienez 18.000 euro banatuko ditu eta elkarte bakoitzarentzako gehienezko dirulaguntza 5.000 eurokoa izango da.
Elkarte eskatzaileek Eusko Jaurlaritzaren Elkarteen Erregistroan eta Getxoko Erakundeen Udal Erregistroan izena emanda eduki beharko dute. Dirulaguntzen helburua eskatzaileen ekintza laguntzea eta osatzea da, inola ere ez mantentze gastuak erabat finantzatzea. Ildo horretan, honako jarduera hauek lagunduko ditu Udalak diruz: langileri gastuak, erakundearen gastu arrunta, publizitate eta propaganda gastuak, heziketa gastuak eta proiektuak diseinatzeko eta garatzeko gastuak.
Eskabideak Udaletxeko Erregistro Orokorrean eta Andra Mariko, Erromoko eta Algortako Herritarrei kasu egiteko Bulegoetan aurkeztu beharko dituzte erakundeek datorren azaroaren 10a baino lehen.

Labels: dirulaguntzak, GGKE

urriaren 24tik azaroaren 9ra
Getxoko Udalaren Euskara Zerbitzuak egitarau zabala eskaintzen digu, Ipar Euskal Herriko kultura, tradizioak eta kultur ekoizpena ezagutzeko. Horrela, gozatzeko aukera zabala izango dugu: "Batek mila, euskal munduak" erakusketa, Ipar Euskal Herriko mendiei buruzko hitzaldi-diaporama, erromeria, Elaudi eta Ken Zazpi-ren kontzertua, gazteei eta sormenari buruzko dokumental interesgarri baten proiekzioa, Koldo Amestoy ipuin-kontalari bikainaren istorioak, eta baita, mendi-txango bat ere.

EGITARAUA

Iparraldeko dantzen ikastaroa
urriak 17 eta 24
Zabala ikastetxeko gimnasioan
17.30-19.30
plaza mugatuak
doan
ikastaroa euskaraz izango da
informazioa: 944660010
Herriko dantza taldeen eskutik. Iparraldeko dantzak ikasteko aukera izango dugu egun bitan. Dantza hauek Kiki Bordatxok eskainiko duen erromerian dantzatuko ditugu.

Iparraldeko kanten ikastaroa
Mikel Markez kantariaren eskutik
urriak 21 eta 28
Itsasganen
19.00-21.00
plaza mugatuak
doan
ikastaroa euskaraz izango da
informazioa: 944660010
Mikel Markez kantariak Iparraldeko kantak ikasteko ikastarotxoa eskainiko du egun bitan; letrak, esan nahia, kantatu... Kanta hauek Kiki Bordatxok eskainiko duen erromerian kantatzeko aukera izango dugu.

Erakusketa
urriaren 24tik azaroaren 9ra
"Batek Mila, euskal munduak"
Algortako Geltokia plazako karpa
10.00-14.00 / 17.00-20.30
bisita gidatuak: 944660010
Inaugurioa: urriaren 24an 19.00. Imanol Landa Getxoko Alkatearen hitzak. Pantxoa Etchegoin, Euskal Kultur Erakundeko zuzendariaren hitzak: "Euskara Ipar Euskal Herrian" hitzalditxoa
"Batek Mila - Euskal Munduak" multimedia erakusketak bidaia bat eskaintzen dizu, unibertso soinudun eta bisual baten bihotzean egiten den bidaia. Gaurko artista, argazkilari, idazle, musikari eta errealizadore batzuen ikuspegi gurutzatuek osatzen duten kaleidoskopioa. Ikuspegi garaikide batetik, erakusketak Euskal Herriko eta diasporako euskal munduen berri eskaintzen du.

Diaporama
urriak 30, osteguna
Ipar Euskal Herriko Mendiak Hurbilagotik (Panpi Olaizolaren eskutik)
Algortako Kultur Etxea
20.00
sarrera dohainik
Diaporama honetan, Zuberoatik Lapurdira joango gara, paraje haietako mendiak ezagutzeko. Argazkien bidez, ondare historikoa ikusiko dugu, artzainen bidea gurutzatu, edota ingurumen babestu bat ezagutuko dugu, oihan, lore eta abere basatiak miresten ditugun bitartean.
Panpi Olaizolak ingurumen arloko ikasketak eginak ditu. Mendiko gidaria da eta euskara teknikari gisa ere ari da Errobiko Herri Elkargoan (Kanbo, Uztaritze, Ezpeleta,...). Panpi Olaizola izango da gidari, azaroaren 9an egingo den Mendi Ibilaldian.

Erromeria eta Txitxiburruntzia
urriak 31, ostirala
erromeria Kiki Bordatxorekin, txitxi-burruntzia eta Atfal elkartearen txosna
Ibaiona Ipar Euskal Herriko txerrikia, Irulegiko ardoa, Eztigar, Sagarnoa
Algortako San Nikolas plaza
19.00
Christian Borda (Kiki Bordatxo) sortzez arbonarra (Lapurdi) da eta txiki-txikitatik izan du eskuetan esku-soinua. Kiki Bordatxo taldean 5 musikari dira. Talde paregabea giroa sortzeko. Euskal dantzak eta kantuak ongi ezagutzen dituzte eta jendea ederto animatzen dute.
Txitxiburduntzia:
Ibaiona Ipar Euskal Herriko txerrikia: Ibaiona etxeak Ipar Euskal Herrian hazten diren kalitate handiko txerriak ekarriko dizkigu txitxiburduntzian erre ondoren dastatzeko.
Irulegiko ardoa: Baxe Nafarroarko Baigorrin eta Donibane Garazin ditu mahastiak Irulegikoo upeltegiak.
Eztigar, Ipar Euskal Herriko Sagarnoa: Hazparne, Garazi eta Oztibarre herrietan egiten den sagardoa ekarriko dugu Getxora.

Ipar-Hegoa kontzertua
azaroak 1, larunbata
Ken Zazpi + Elaudi
20.00
Getxo Antzokia
sarrera: 5€ (urriaren 20tik salgai)
sarrerak erosi
Ken Zazpi (Hego Euskal Herria: Gernika): Ken Zazpi taldeak erraz harrapatzen du publikoaren arreta, jendearen unean uneko sentsibilitatean asmatzen duten konposizio bikainak moldatzen jakin izan baitu hasiera-hasieratik. Kantu sarkorrak, lelo distiratsuak eta mezu konprometituak sortuz, iluzio bizigarri eta gogotsuak barreiatzen ditu Gernika aldeko taldeak, publikoaren artean.
Kontzerturako sarrerak lortzerik ez dutenetzat pantaila handia jarriko da San Nikolas plazan.
Elaudi (Ipar Euskal Herria: Hazparne eta Itsasu): Elaudi taldea (Zuberoako mendi baten izena) 1997an sortu zen. Elaudiren folk musikak munduko hainbat herrialdetako musiken eragina du: Euskal Herriko kantak, Mallko blues-a, arabiar mundukoa, Kubakoa, ijitoen doinuak,...

Dokumentala: "Burp Underground Report"
azaroak 4, asteartea
My Jok kolektiboaren eskutik
Algortako Kultur Etxea
20.00
sarrera dohainik
Maianak eta Jokinek MY JOK osatzen dute, plataforma artistiko, sortzaile eta berezia. Burp Underground Report dokumentala aurkeztuko digute: Iparraldeko bost pertsonal/talde hautatu dituzten haien berezitasun, sormen eta iritziak azaltzeko. Modu horren bidez, euskal gazteriaren beste ikuspuntu bat eskaintzen dute, topikoetatik urrun. Getxon bigarren bideo erreportaje berezia aurkeztuko dute eta eztabaida sortuko parta hartzaileekin. Emanaldia berezia, gazteei zuzendua...

Ipuin-kontalaria: Koldo Amestoy
azaroak 6, osteguna
9 urtetik gorako umeentzat eta gurasoentzat
Geroa ikastolan
18.00
sarrera dohainik
"Biderdi" ipuinak umeak lokartu eta helduak esnatzeko dira.
Antzina, supazterrean kontatzen ziren ipuinak. Emeki-emeki, bizitza modernoaren zurrunbiloan iraungitzear zirela, Koldo Amestoy (Arruta, Nafarroa Behera, 1952) agertu zen. Hitzen magoa dugu Koldo, irudimena biziaraztea arte bat dela erakutsiz.
Familia giroko publikoarentzat: helduak eta 8 urtetik gorako haur eta gazteak

Mendi ibilaldia
azaroak 9, igandea
Sara - Larrun - Hiru Iturriak - Altxanga - Sara
irteera: 8.00etan, Getxotik (autobusez)
izen-ematea: urriaren 13tik, Algortako Kultur Etxean
prezioa: 3€
Altxangako itzulia (Saratik): 3 ordu inguru, 450 metroko desnibela, 8 km inguru. Saratik abiaturik, Larrunera igoko gara Hiru Iturrietako leporaino. Hortik aitzina, Altxangako bizkarraren itzulia hasiko dugu eta Sarara jaitsi berriz.
Egitaraua: 8etan Getxotik irten, 10etan Sarara iritsi, 10.30ean ibilbidea hasi. Ibilaldia amaitutakoan bazkaria (norberak). Bazkariaren ondoren euskal pastela eta Iparraldeko sagardoa (doan) dastatzeko aukera Saran. Azalpenak euskaraz izango dira.

Labels: euskal kultura, euskara, ipar euskal herria, iparra galdu gabe

Ba al zenekien, Benito Lertxundik "itsas ulu zolia" izenburuarekin argitaratutako azken diskaren irudia, Carmelo Bilbao Unanuek margolari getxoztarrak egindakoa dela?

Labels: Benito Lertxundi, Carmelo Bilbao Unanue, musika

Gaur itsasoa eta itsas gizonak izan dira protagonistak Getxon. Goizean Unai Basurkoren irteera hunkigarrian egon gara agurra ematen eta arratsaldean Jose Luis Ugarteri eskeinitako omenaldia burutu dugu. Ikasle eta maizu, bien arteko lotura, Unai bere Pakea Bizkaian daraman ikurrinan ikus daiteke. Azken batean ikurrina hori Jose Luisek Vendée Globean 1993an erabilitakoa da. Hori dela eta Unairi eman zion bere lasterketetan eramateko.

Labels: Jose Luis de Ugarte

Labels: jose luis ugarte, omenaldia

Labels: bela, kirola, unai basurko, vendée globe

Urriaren 24an eta 25ean I. Getxo Sound Festival jaialdia izango da Getxo Antzokian. Ekimen horrek bi helburu ditu: batetik, talde getxotarren lana bultzatu eta hedatzea eta, bestetik, publikoak banda gazteen musika ezagutzeko aukera ematea. Jaialdiaren lehenengo ekitaldian zortzi talde ariko dira, lau banda eguneko.

Pop-rock taldeak sustrai handiko kolektiboa dugu Getxoko kultura arloan. Izan ere, 80ko hamarkadaren amaieran mugimendu indartsua sortu zen, bertoko bandek eta Getxoko Kultur Etxeak bultzatuta. Getxon bakarrik ez, baita kanpoan ere ospea lortu zuten, hein handi batean garai horretan Getxon zegoen kontzertu-areto bat zegoen eta.

Urte horietan hainbat talde sortu ziren Getxon. Horien artean El Inquilino Comunista, Los Clavos eta Lord Sicknes aipatu behar dira ospetsuenen artean. Horiek zabaldutako bidea beste batzuk ere hartu zuten. Mugimenduak ospe handia lortu zuen eta bai hedabideek bai musika jaialdiek bultzatua izan zen. Garai horretako hainbat taldek diskoak grabatu zituzten Getxoko Kultur Etxeko laguntzaz eta jaialdi, kontzertu eta musika-lehiaketa askotan parte hartu zuten.

Azken urteotan beste talde getxotar batzuk agertu zaizkigu eta, Kultur Etxearen laguntzaz estudio grabaketak egiteko aukera izan dute. Besteak beste, honako talde hauek bere musika maketak gauzatu dituzte: Sweet Oblivion, Standard, Izenik Ez, Iraultza, Patada en la Papada, Sile, Zurkaitz, Ehiztari Beltza, Zodiacs eta Nobel, besteak beste.

Getxo Sound jaialdia aurrerapauso berria dugu Getxoko Kultur Etxearen eta bertako taldeen arteko lankidetzan. 90eko hamarkadan hasi zen lankitza hori, Getxoko talde-errolda sortuta. Hori izan zen taldeentzako laguntza-programaren abiagunea. Gaur egun, hogei taldek osatzen dute errolda.

Laguntza programa bizirik dirau eta honako ekimen hauek hartzen ditu: maketa eta disko grabatzeko, kartelak inprimatzeko eta argazki-liburu profesionala egiteko laguntzak. Horrezaz gain, Getxoko taldeek Riff Musika Eskolako entsegu-gelak erabiltzeko deskontuak ditzute. Azkenik, blues taldeek Getxoko Blues jaialdian parte hartzeko aukera dute eta beste talde guztiak Getxoko jaietan jardun daitezke betiere batzordeek hautatuak badira.

Lehenengo Getxo Sound jaialdian honako talde hauek jardungo dira: Olimpia, Dynamo, Smile, Sweet Oblivion, Mochlic, Atomic Disaster, Ukabilkada eta Patada en la Papada. Bi egunetan zehar, bere trebezia eta Getxoko taldeen sasoi ona erakutsiko dituzte. Halaber, horien musika osatzen dituzten estilo eta eragin anitzak ezagutzeko aukera izango dugu jaialdian.

I GETXO SOUND FESTIVAL

Urriaren 24an eta 25ean / 24 y 25 de octubre
Getxo Antzokia - 20:00
sarrera gonbidapenez / entrada con invitación


EGITARAUA / PROGRAMA

Ostirala 24 Viernes

OLIMPIC
DYNAMO
SMILE
SWEET OBLIVION


Larunbata 25 Sábado

MOCHLIC
ATOMIC DISASTER
UKABILKADA
PATADA EN LA PAPADA

Labels: getxo sound, kultura, musika

OLIMPIC

Olimpic 2005. urtean hasi zen bere jarduera, dibertimendu hutsa bezala, beren melodiak eta ideiak askatzeko. 2006. urtearen erdialdean proiektua guztiz gauzatzen da. Sintetizadoreak erabiltzen hasten dira eta taldeak beste norabide bat hartzen du, gero eta serioagoa. 2007an bere burua aurkezten dute publikoan eta Proyecto Demo '07 lehiaketa irabazten dute. Halaber, XIX. Bilbao Hiria lehiaketan aritzen dira eta, horrek bultzatuta, talde europarren truke-programa batean parte hartzen dute. Urte horretan ere Lemonpop maketa lehiaketan, Gaztealdia '07 lehiaketan eta San Adriáneko XII. lehiaketan garaile izan ziren. Mondo Sonoro aldizkariak "2007ko talde demoskopikoa" izendatu zuen Olimpic a Kaiser Chiefsen telonero bezala jardun ziren. Besteak beste, FIB Heineken, Ebrovisión, Let's Festival, Le Nörd Fest, Cream Pop, B.A.M.eta Bilboloop jaialdietan parte hartu zuten. 2008an estreinaldi diskoa grabatu dute: "Dirty Towels" Discos Fever diskoetxean eta udazkenean kaleratuko da.

Taldekideak:

* Asier Martín (gitarra eta ahotsa)
* Adrián de los Ojos (teklatuak)
* Igor Arias (baxua)
* "Gurru" (bateria)

Informazio gehiago OLIMPIC

DYNAMO

Dynamo 2007an abiatu zen hainbat eragin eta kutsu dituen pop-rock eskaintza batekin. Iaz grabatu zuen taldeak bere lehenengo demoa eta arrakasta handia izan zuen. Lan horri esker Euskadi Gaztearen maketa lehiaketan nagusitu ziren eta beste zenbait lehiaketetako finaletan ere jardun ziren: Heinekin Greenspace. Gaztealdia, Tremendo Pop, Bilbao Hiria... Halaber, bere lehenengo lana 2007ko maketarik onena hautatu zuten Mondo Sonoro musika aldizkarian. Urteari amaiera bikaina eman zioten Bilbao Live jaialdian. Bertan REM, Lennky Kravitz edota Prodigy mailako talde eta artistarekin agertu ziren. Aurten Gironara joan da Dynamo estreinaldiko diskoa grabatzeko Jordi Moraren (Standstill, Bunbury...) eta Ricky Falknerren (Standstill eskutik). Lana hemendik gutxira egongo da salgai.


Taldekideak:

* Antonio Garamendi (gitarra eta ahotsa)
* Paco Regalado (gitarra)
* Javier Hernández (baxua)
* Kike Isasi (bateria)

Informazio gehiago: DYNAMO

SMILE

Getxon sortu zen Smile 1996. urtean, John Franks kantautoreak bultzatzuta, Gravestones eta Little Fish taldeetako zenbait kiderekin bat egin ondoren. Zenbait urtez taldeak atseden egin zuen baina, ondoren indartsu bueltatu zen errepertorio zabalarekin. Horretan, besteak beste, Mendebalde-kostaldeko kantak ("Lovin Spoonful", "Love", Byrds"...) eta 70eko hamarkadako eta mugimendu akustiko berriaren (Jack Jonson, Ben Harper, Jayhawks, Josh Rouse…) eraginak bildu dituzte. Egun arte, 2 demo grabatu dituzte eta orain dela gutxi "Painting the Soun One Colour" diskoa kaleratu dute Rock Indiana diskoetxean, 10 kanta berriekin. Azken garaietan Wilco eta Waterboys taldeen telonero aritu da banda.

Taldekideak:

* John Franks (ahotsa eta gitarra akustikoa)
* Daniel Merino (gitarra eta ahotsa)
* Ferdy Martínez-Bretón (baxua)
* Javi González (bateria)

Informazio gehiago: SMILE

SWEET OBLIVION

Sweet Oblivion Alfonso Arana Cujo talde getxotarraren musikagile, abeslari eta gitarra-jolearen proiektu berri dugu. Musika munduan duen jarduera talde horrekin 1995etik 2005era grabatutako 7 diskoek bermatzen dute. Halaber, Cancer Moon Bilboko bandan aritu zen 1991etik 1995era.

Sweet Oblivionek bere alde bihozbera erakutsi zuen lehenengo diskoan: "Wasted Lovesongs" (2006, Noizpop Recordings), hain zuzen ere. Inspirazio handiko kantak eta Ce abeslari gaztearen ahotsa dira lan horren ezaugarri nagusiak. Izan ere, emakumezko eta gizonezko ahotsak bateratzea taldearen bertuterik nagusiena da. Iaz hainbat gelatan aurkeztu zuten diskoa eta "Artistas en Ruta" ekimenean parte hartzeko hautatuak izan ziren. Horri esker zenbait hiritan zehar egin zuten bira eta harrera ona eman zieten.

Hemendik gutxira bere lan berria kaleratuko da: "Black Sheep Serendade", Audiomatic estudioetan ekoiztua. Disko hori aurrerapauso handia da taldearen jardueran: denboraz kanpoko pop-rock doinu pertsonalagoa garatu du eta, nobedade gisa, María Isasi teklatu-joleak sartu da taldean kant aberriei beste kutsu batzuk emateko.

Taldekideak:

* Ce (ahotsa)
* Alfon Arana (ahotsa eta gitarra)
* María Isasi (teklatuak)
* Txema Solano (baxua)
* Gurru (bateria)

Informazio gehiago: SWEET OBLIVION

Labels: dynamo, getxo sound, musika, olimpic, smile, sweet oblivion, taldeak

MOCHLIC
Hainbat motatako eragineko musika jotzen du talde horrek, salbuespenik gabe. Taldekideek hainbat estilo jorratzen dituzte, nahiz eta rock moelodikoaren eta poparen nahasketa gustokoena izan. Hori musikarien gustu bateratasunaren isla da. Taldearen jarduera orain dela bi urte hasi aukera ematen dietenean.

Orain dela bi mende erabiltzen zen botika batetik hartu du izena taldeak. Botika hori gaixotasuna behin eta betirako osatzeko; hala ere, batzuetan gaixotasuna bera baino kaltegarriagoa gerta zitekeen sendagaia. Mochliceko taldekideentzat proiektua eguneroko betebeharretatik alde egiteko baliabidea da. 2008an taldeak hirugarren saria irabazi zuen Barakaldoko Rock Star aretoan egin zen DemosTrack lehiaketan.

Taldekideak:

* Fausto Bayano (ahotsa)
* Mauricio Ruiz (gitarra)
* Borja Niclós (baxua)
* Bernat Bárcena (bateria)

Informazio gehiago: MOCHLIC


ATOMIC DISASTER
Atomic Disaster trash-hardcore-punk musika taldea egiteko asmotan sortu zen. Lehenengo entseguetan "Smoking Kills" edota "United Forces" S.O.D.en bertsioa kantak sortu ziren. Aurreko saioen arrakastaren ondorioz taldea aurrera jarraitu zen eta beste zenbait abesti gehitu zitzaizkion bere errepertorioari, "Self-destruction" eta "Mosphit", esaterako. Bere lehenengo maketari esker lehiaketa batean garaile atera zen taldea eta Des-Kontrol taldearen telonero aritzen da banda Algortako jaietan. Bere bigarren maketan beste lau kanta grabatu dituzte.

Taldekideak::

* Raúl Ureña (ahotsa)
* Jon García (gitarra)
* Álvaro Alamán (baxua)
* David Aranda (bateria)


Informazio gehiago: ATOMIC DISASTER

UKABILKADA
Ukabilkada 2003. urteko udaberrian sortu zen, Pipa eta Martín taldekideek bultzatzuta. Handik gutxira gainerako kideak bildu zituzten. Zenbait aldaketen ondoren, beste gitarjole bat sartu zuten taldean (Mentxi), bandaren indarra bultzatzeko asmotan. Musika talde baino, Ukabilkada lagun-koadrila dugu.

Informazio gehiago: UKABILKADA


PATADA EN LA PAPADA
2001. urtean hasi zen taldearen jarduera eta, handik hona, hainbat agertokitan jardundira. Hitz garratz eta zehatzak dira taldearen ezaugarri nagusia. Egun arte bi lan kaleratu dituzte bere kabuz: "Patada en la Papada" (2003) eta "Carne de matadero" (2008).

Taldekideak:

* Aitor (ahotsa)
* Pinz (gitarra)
* Ibai (baxua)
* Endika (batería)

Informazio gehiago: PATADA EN LA PAPADA

Labels: atomic disaster, getxo sound, mochlic, patada en la papada, ukabilkada

Aurreko astetik Maidagan trenbide-pasagunearen lurperatze lanak eta Andra Marin kokatuko den geltoki berriaren lanak kontsultatu daitezke, Bidezabalgo anbulatorioaren parean, Bizkaiko Garraio Partzuergoak jarri duen informazio-moduluan.

Labels: Andra Mari, geltoki, maidagan, metro

Egilea: Lobo Altuna

Egilea:: Dionisio González

Egilea:: Marcos López

Egilea:: Fernando Maquieira

Egilea:: Julio Bittencourt



PDF fitxategiaren deskarga Getxophoto 2008ko maparekin.

Informazio gehiago: www.getxophoto.com

Labels: GETXOPHOTO

Ia 300 lagunek bisitatu dute Erromoko Txabarri Zuazo (Gobelaurre) parkea urbanizatzeko proiektuari buruzko erakusketa, lehenengo lau egunetan. Erakusketa datorren igandera, hilaren 12ra arte ikusi ahal izango da Santa Eugeniako Kultur Aretoan. Pertsona interesatuek egitasmoa ezagutu eta berari buruzko ekarpenak eta iradokizunak aurkez ditzakete.
Gobernu Taldeak aurkeztutako proposamena orain arte ikusi dutenen ia erdiak gurasoak izan dira eta gehienak Erromokoak. Erakusketa amaitutakoan behin betiko bisiten kopurua zein izan den jakin ahal izango da eta baita Udalak herritarrek parte hartzeko bultzatutako prozesu honetan egindako iradokizunak ere.
Parkea urbanizatzeko proiektua ezagutu nahi dutenek oraindik aukera dute, astean zehar arrtsaldeetan soilik, 17:00etatik 21:00etara eta larunbatean eta igandean goizez ere, hau da, 10:00etatik 14:00etara eta 17:00etatik 21:00etara.
Aipatu bezala, opozizioaren (PP-PSE-EE) babesarik ez duen egitasmo honek 1,8 milioi euroko aurrekontua du, (ez zuen PP eta PSE-EE alderdien babesarik eduki azken osoko bilkuran) eta sarbide berriak egitea proposatzen du parkea irazkorrago bihurtzeko eta sartzea errazteko; umeentzat eta gazteentzat bi jolas-eremu, pertsona nagusientzako asialdi eta kirola egiteko gunea ere sortuko dira; berdeguneak berrantolatuko dira (ibilbide nagusietan oinezkoentzako pasealeku zabalak izango direla) eta parkera sartzeko dagoen eskailera kopurua ere gutxitu egingo da.


Ohar honen hedapena eskatzen dizuegu.Aldez aurretik,beti eskeintzen diguzuen harreta eskertzen dizuegu. Begirunez.

Igande honetan Getxo Saskibaloiaren aurkezpenera joan nintzen. Aurreko urteko aurkezpena ikusgarria izan zen oso eta beraz aurten gogoekin joan nintzen. Unkigarria izan zen berriz ere grada guztiak zaletuz ia beteta ikustea eta batez be kantxan bertan poliki poliki agertzen joan ziren talde ezberdinen kide guztiak, nola animatzen zuten entzutea.

Aurten gizonen lehen taldea lehen mailara bueltatu da berriz, bertan mantentzeko helburuarekin. Emakumeak berriz, aurreko denboraldian eroso egon baziren lehenengo mailan (sailkapenaren erdian geratu ziren), aurten gora begiratzeko nahiarekin hasi dira.

Edozein kasutan, Faduraseko ohiko garagardotegian antolatutako amaiketakoan, taldekide, zaletu eta lagunen artean sortutako giro itzela azpimarratu egin behar da. Prisco Fernandez eta bere taldeak ondo antolatutako proiektua bultzatzen ari dira eta hori nabarmen ikusten da.

Aurrera beraz!

Labels: kirola, saski baloia

Ongi etorriak blogosferara!!!

Ta zorionak zuen bizipenak blog honen bitartez partekatzeagatik.

Hau nik egin dut! bloga

Labels: blog

Getxoko Udaleko Berdintasun Zerbitzuak “Emakumeen ekarpena Getxoko historian” ikerketa beka deitu du. Ekimen honen helburua Getxoko emakumeek bete duten paperaz datu berriak argitaratzeko edo datu jakinetan sakontzeko da. Legegintzaldi Plangintzan agertzen denez, Getxoko emakumeek historia, eta bizitza artístico, kultural, sozial, ekonomiko edota politikoan, hau da gure udalerriko historian, egin duten ekarpena berreskuratzea eta ezagutzera eman nahi da, meendeetan, emakumeak baztertuak izan baitira historia ofizialean.

Lanak aztertuko duen gaia emakumeek Getxoren historian izan duten paperari buruzko datuak eskaintzen dituen edozein ikerketa izango da. Emakume batek modu indibidualean, emakume talde batek edo Getxoko emakumeek kolektibo gisa historian eginiko ekarpena izango da ikerketa honen helburua. Edonola ere, Getxoren edota inguruaren historiari eginiko ekarpenak edo betetako paperak udalerri honen errealitate kultural, sozial, ekonomiko edo politikoa erakutsi behar du.

Beka norbanakoak edo taldeak eska dezakete. Ikuspegia historikoa, hezkuntzakoa, lanekoa, ekonomikoa... izan daiteke; diziplina ugari bateratu ditzake halaber. Beka eskatu ahal izateko, parte hartzaileek lan proiektu bat aurkeztu behar dute, gehienez 10 foliotakoa, 2008ko azaroaren 15a baino lehenago, Getxoko Udaleko Erregistro Nagusian. Hau jarri behar da: “EMAKUMEEN EKARPENA GETXOREN HISTORIAN” IKERKETA BEKA”.


Informazio gehiago

PDF fitxategiaren deskarga ikerketa bekaren xehetasunekin.

Labels: beka, berdintasuna, emakumenak, hstoria

Eguraldiak laguntzen badu, gaurBillabong Pro Mundakan leia ederra ikusteko aukera izango dugu. Kelly Slater 8 aldiz Munduko txapelduna eta Eneko Acero getxoztarra aurrez aurre.


Heat 8: Kelly Slater (USA) vs. Eneko Acero (EUK)

Aurrera Eneko!!!

Labels: eneko acero, getxoztar, surf

Urria eta antzerkia elkarri lotuta daude Getxon. Udazkena iristeaz batera Antzerki Jardunaldiak ate joka ditugu berriro ere, azken hogeita sei urteetan bezala euskal antzerkigintzaren produkziorik onena gurean aurkezteko asmoz. Horrela bada, urriaren 9tik 19ra bitartean Bizkaia, Gipuzkoa, Araba eta Nafarroako 14 talderen azken lanak ikusketako aukera izango dugu. Beren filosofiari eutsiz, Jardunaldien xede nagusia antzerkigintza sustatzea eta jendeari kalitatezko proposamen bat, ikusle mota guztien gustuak asetzeko modukoa, eskaintzea da, adina kontuan hartu gabe. Hori dela eta, egitarauak helduentzako zein haurrentzako antzezpenak, euskarazko zein gaztelaniazko lanak eta oso genero eta gai ezberdinak barne hartuko ditu.

Urriaren 9tik 19ra
Getxo Antzokia, Algortako geltokiko plaza, Areetako Musika Eskola

Informazio gehiago

Egitaraua

Labels: antzerki, jardunaldiak

Datozen hilabeteetan, Urgul kalean, Algortako “Gauegun” Gaztelekua izango den lokaleko egokitzapen lanei ekingo zaie. Horretara bideratutako aurrekontua 90.000€ ingurukoa da.
Algortako “Gauegun” Gazteleluko zaharberritze lanak, bai espazioen banaketari dagokionez, bai alderdi estetikoei dagokienez, orain dela bi urte ekipamendua definitzeko prozesuan parte hartu zutenek (heldu zein gazteek) ezarritako irizpideei egokituko zaizkio.
Lanen adjudikazioa bi edo hiru hilabete barru egingo dela espero da. Era berean, lanetarako beste bi hilabete beharko dira. Beraz, Gaztelekua neguaren amaieran zabal liteke. Ordutik aurrera, lokala egunero irekiko da, arratsaldetan.
Gaztelekua 12 urtetik 17 urtera bitartekoentzako gazte ekipamendu bat da. Ekipamendu honekin adin desberdinetako ume eta gazteentzako aisialdirako ekipamendu sarea eratzeko lanari jarraipena eman nahi zaio. Lan ildo hau 5 urtetik 10 urtera bitarteko haurrentzako Areetako Ludotekarekin hasi eta 2009an 5 urtetik 11 urtera bitartekoei zerbitzua emango dien Algortako Ludotekarekin jarraituko du.

Labels: gauegun, gazteleku

Kalean edo lokal itxietan ikuskizunak antolatzeko zailtasunak handiak direla jakitun delarik, Udaleko Gazteria Zerbitzuak horrelako jarduerak antolatzeko lanak ahalik eta gehien erraztea helburu duen gida txiki bat argitaratu du. Batez ere, elkarteentzako materiala da (kultur erakundeak, aisialdi edo kirol elkarteak...), hauentzat kalea baita gehien erabiltzen duten esparruetako bat. Hala ere, edozein lagun edo lagun-talderentzat ere lagungarria izan daiteke baldin eta kalean zerbait antolatzeko asmotan badabil.

Gidak jasotzen duenez “...horrelako kale jarduerek gure udalerriko kultur eta gizarte giroa aberasten dute...”. Boluntarioan koordinazioa, publizitatea edo bestelako zerbitzuen kontratazioa bezalako ohiko antolakuntza lanei, ordea, udal baimena lortzeko, udalaren diru-laguntza lortzeko edo, baita ere, garbitasuna eta segurtasuna arloko araudiak betetzeko tramiteak gehitu behar zaizkio.
Zalantzarik gabe, hainbeste tramiteren aurrean edonork egin lezake atzera. Horixe da, hain zuzen ere, gida honek ekidin nahi duena, hau da, getxoztar guztiak kaleko jardueren bitartez gure udalerriko gizarte eta kultur giroa aberastera animatzea.

Gidak hainbat atal ditu. Hauetako bakoitza ikuskizunak antolatzeko orduan sortu ohi diren beharrei erantzuna ematen saiatzen da: aholkularitza (udal zerbitzuek eskaini dezaketen edozein arlotan laguntza), diru-laguntza (horrelakorik eskatu nahi balitz) eta baimenaren tramitazioa (erantzukizun zibileko aseguruak, anbulantziak, argindar loturak edo egiturak eraikitzea)

Dokumentuak egin beharreko tramite guztiei buruzko informazio zehatza eta argia eskaintzen du, urratsez-urrats.

PDF fitxategiaren deskarga Gidarekin.



Gidarekin doazen eranskin eta inprimaki guztiak udalaren web gunean (www.getxo.net) eta Gazte Informazio Bulegoan daude eskuragarri. Halaber, aurki Getxoko elkarteen artean banatuko da.

Labels: antolaketa, ekitaldiak, gida